ආදරය, බෝනික්කා හා බීමත්කම

ඔන්න ඉතින් කාලෙකට පස්සෙ ආයෙත් මං ඔයාලව හමුවෙන්න ආවා. මගේ කාර්‍ය්බහුලත්වය නිසාම මල් දෙවැටෙ යාලුවොත් එක්ක එකතු වෙන්න නොහැකි වීම ගැන මං මුලින්ම සමාව ඉල්ලනවා. අදත් කියන්න යන්නෙ කථාවක්. මේක මට උන දෙයක් නෙවෙයි. ඒත් කතාව කියන්නෙ වෙන කෙනෙක්. මං එයා කියන විදිහට තමයි කතාව ගොඩනගන්නෙ. මේකයි කතාව.

මං කඩේ ඇතුලෙ ඇවිද ඇවිද ඉන්නකොට මං දැක්කා කඩේ cashier, එතන හිටපු පිරිමි ළමයට ආයෙත් සල්ලි දෙනවා. ඒ ළමයගෙ වයස අවුරුදු 8කට වැඩි වන්න බෑ. Cashier කිව්වා ඒ බෝනික්කාව ගන්න සල්ලි මදි කියලා. එතකොට ඒ ළමයා එතන හිටපු කාන්තාවකගෙන් ඇහුවා cashier කියන්නෙ ඇත්තද කියලා. ඇය ඔව් කිව්වා.

ඇය ඒ ළමයට ඉන්න කියලා ඊට වඩා ගාන අඩු බෝනික්කෙක්ව හොයන්න ගියා. ළමයා අර බෝනික්කව තියාගෙන තාමත් එතන ඉන්නවා. මං ඔහු ළඟට කිට්ටු වෙලා ඇහුවා බෝනික්කා කාටද කියලා.

ඔහු කිව්වා, “මේක තමයි මගේ නංගි නත්තල් සීයා එයාට නත්තලට දෙයි කියලා බලාපොරොත්තුවෙන් හිටපු බෝනික්කා.” එතකොට මං කිව්වා “දුක්වෙන්න එපා, නත්තල් සීයා එයාට ඒක දේවි කියලා.”

ඒත් ඒ ළමයා දුකින් කියනවා, “නත්තල් සීයට මේක දැන් නංගි ඉන්න තැනට ගිහින් දෙන්න බෑ. මං මේක අම්මට දෙනවා, එතකොට අම්මා ඒක නංගිට දෙයි එයා නංගි ඉන්න තැනට ගියාම.” මේක කියනකොට ඒ ළමයගේ ඇස් දුකින් බරවෙලා තිබුනෙ. “මගේ නංගි දිව්‍ය ලෝකෙ ගියා. තාත්තා කියනවා අම්මත් ඉක්මනටම දිව්‍ය ලෝකෙ යනවලු. ඒ නිසා මං හිතුවා මේ බෝනික්කව අම්මා අතේ නංගිට යවන්න.

මට මගේ හදවත නතර වෙනවා වගේ දැනුනා. මේ ළමයා මං දිහා බලලා මට කියනවා, “මං තාත්තට කිව්වා අම්මට කියන්න කියලා මං එනකන් යන්න එපා කියලා. මට ඕනෙ අම්මව මං කඩේ ගිහින් එනකන් යන්න නොදී තියාගන්න.

ඊට පස්සෙ ඔහු මට එයාගෙ ලස්සන පින්තූරයක් පෙන්නුවා. එයා හිනාවෙලා කියනවා, “අම්මට මං මේ පින්තූරෙ දෙනවා, එතකොට එයාට මාව අමතක වෙන්නෙ නැති වෙයි.” මෙහෙමත් කියනවා, “මං අම්මට ගොඩක් ආදරෙයි. මං කැමතියි අම්මා මං ගාවම තියාගන්න. ඒත් තාත්තා කියනවා නංගි තනියෙන් නිසා අම්මා එහේ යන්න ඕනෙලු.

එහෙම කියලා ඔහු නිහඬවම බෝනික්කා දිහා දුකින් බැලුවා. මගේ අත පසුම්බියට ළගා උනා. “අපි බලමු ආයෙත් මේ බෝනික්කාව ගන්න සල්ලි ඔයා ලඟ තියෙනවද කියලා.” මං කිවා. ඔහු ළඟ තිබුන මුදල් මට දුන්නම මං ඔහුට නොදැනෙන්න සල්ලි ටිකක් එකතු කළා. ආයෙත් ගනන් කලාම වැඩිපුරත් එක්ක මුදල් තිබුනා.

එතකොට ළමයා කියනවා. “දෙවියන්ට ස්තුති වෙන්න ඕනෙ මට ඇති තරම් සල්ලි දුන්නට. මම පෙරේදා නින්දට යනකොට දෙවියන්ට කිව්වා මට මේ බෝනික්කා ගන්න ඇති තරම් සල්ලි තියෙන්න කියලා. ඒක දෙවියන්ට ඇහෙන්න ඇති.”

“ඒ වගේම මට ඕනෙ කලා අම්මට දෙන්න සුදු රෝස මලක් ගන්නත්. ඒත් ඒක ගන්න සල්ලි ඉල්ලලා මං දෙවියන්ට කරදර කළේ නෑ. ඒත් දෙවියෝ මට බෝනික්කයි, රෝස මලයි දෙකම ගන්න සල්ලි දීලා. අපේ අම්මා සුදු රෝස මල් වලට හරිම ආසයි.”

එදා මං ගෙදර ගියේ අමුතුම හිතකින්. මට ඒක නිතරම මතක් උනා. පත්තරේ මීට දින දෙකකට කලින් උන අනතුරක් මට මතක් උනා. මං පත්තරේ ආයෙත් බැලුවා. ඒකෙ තිබුන අනතුර වෙලා තිබුනෙ බීපු මිනිහෙක් කාර් එකක් හප්පපු නිසා. කාර් එකේ තරුණ කාන්තාවකුයි, කුඩා ගැහණු ළමයෙකුයි ඉඳලා. ළමයා එතනම මිය ගිහින්. කාන්තාවට බරපතල තුවාල වෙලා දැනට ඉන්නෙ කෝමා තත්ත්වයෙලු. ජීවිතේ රැඳිලා තියෙන්නෙ රෝහලේ යන්ත්‍ර මගින්ලු. ඒ නිසා ඇගේ ජීවිතේ ගැන තීරණයක් ගන්න පවුලේ අයට ඉඩ දීලාලු. මේ අර ළමයගෙ පවුලද?

දින දෙකකට පස්සෙ ඒ කාන්තාව මිය ගිය බව පත්තරෙන් දැනගන්න ලැබුණා. මට නොදැනුවත්වම මාව අවමංගල්‍යයට යන්න පෙළඹුණා. මං සුදු රෝස මල් පොකුරක් අරන් ගියා. ඈට අවසන් ගෞරව දක්වන්න ඇගේ දේහය ළඟට ගියා.

ඇගේ අතේ සුදු රෝස මල් පොකුරක් තිබුණා. ඇගේ දේහයේ ළමැද පින්තූරයක් එක්ක බෝනික්කෙකුත් හිටියා. මං ඒ ස්ථානය කදුලු පිරුණු දෑසින් හැර ගියා.

ඒ පොඩි ළමයාගේ හිතේ අම්මාටයි නංගිටයි තිබුණ ආදරය කොයිතරම්ද කියලා හිතුණා. ඒත් ඒ සේරම බීපු මිනිහෙක් අරන් ගිහින්.

මල් දෙවැටේ යාලුවනේ, මේක හිතට ගන්න. කිසිම දිනක බීලා වාහන එළවන්න එපා. පුලුවන්නම් මේ පණිවිඩය ඔයාලගේ Email හා Facebook යාලුවොත් එක්කත් Share කරගන්න.

මගේ ආදර සැමරුම

අද මල් දෙවැටෙ ඔයාලගෙන් මුලින්ම මම  සමාව ඉල්ලනවා. ඒ අද ඔයාලට මේකෙ බලන්න වෙන්නෙ මගේ පෞද්ගලික සටහනක් නිසා. මම ගොඩක් ආදරය කරන මගේ ති....... නංගි හා මගේ ආදරයේ 500 වන දින සැමරුම වෙනුවෙනුයි මම මේක ලියන්නේ. ඒ නිසා මගේ යාලුවන්ගෙන් මම අද සමාව ඉල්ලනවා ඔයාල වෙනුවෙන් යමක් පල කිරීමට නොහැකි වීම ගැන.

ආදරණීය ති....... නංගිට,

2008 වසරේ බිනර මාසයේ එක් සොඳුරු දිනයක ආදරයත් රැගෙන මා වෙත පියමැන්න ඔයාගෙ පින්බර නෙතු ගැටුණු කල මටත් හොරා මගේ හිත ඔයාට ආදරය කලා. ඒ ආදරය නිසාම සමහර අවස්ථාවල මගේ ඇස් වලට කඳුලු පිරුණා. වප් මාසයේ තුන්වන දින ඔයාගෙන් අයැද සිටි ඒ ආදරය මා වෙත නැවත එන්න මාස ගණනක් ගත උණා. ඒ අතරතුර කාලය තමයි මගේ ජීවිතයේ ගෙවුණු අසීරුතම කාලය.


ඒ කාලයේ ඔයාගෙ දෙනෙතේ එක බැල්මකින් පවා මගේ හිත හිනැහුණා. ඔයාගෙ කටහඬ හිත ඇතුලෙ දෝංකාර දුන්නා. ඒ පීඩනය හිතේ තියාගෙන ගෙවුණු මාස ගැන කල්පනා කරද්දී මටම පුදුමයි මම කෙල්ලෙක්ට මේ තරම් ආදරය කරන විදිහ හිතෙනකොට. ඔයාට මතකද මගේ වියලුණු කතරට දිය බිඳක් රැගෙන ඔයා ආපු දිනය? අදට හරියටම දින 500 යි.


මේ ගෙවුණු දින 500 ට මගේ ආදරය තව තවත් වැඩි උනා මිසක් බිඳුවක්වත් අඩු වෙලා නෑ. උදේ හවා මට ඔයාව සිහිවෙන්නෙ ආදරය නිසයි. ඔයාව නොදැක මට මොහොතක්වත් ඉන්න බෑ. සිහිනයෙන් සිහිනයට පේන්නෙ ඔයාව විතරමයි නංගි. උදාවෙන හැම දිනයකම පලමු සිතිවිල්ල ඔයා. මගේ ජීවිතයට සිනහව ගෙනාපු ඔයාට මම ගොඩක් ආදරෙයි. හැම ආත්මෙකම ඔයා මගේම වෙන්න කියලයි මම පතන්නේ.


දහසක් ළඳුන් දුටුවත් පවතින තුරු දිවිය
නුඹයි එකම ළඳ මගෙ සිත ඇදී ගිය
නොදනිමි කිමද නුඹටම සිත ඇදී ගිය
සොයනෙමි කිමද නුඹටම සිත බැඳී ගිය


මේ ඔයාට පණටත් වඩා ආදරය කරන ඔයාගෙම අයියා....

ලුණු දාපු කෝපි කෝප්පය (පුදුම හිතෙන ආදර කතාවක්)

මේ කථාව මට ආපු Email එකක්. මට හිතුනා ඒක මල් දෙවැටෙ මගේ යාලුවොත් එක්ක බෙදාගන්න එක හොඳයි කියලා. ඒ නිසා මං මේක සිංහලට පරිවර්ථනය කලා. කියවලාම බලන්නකො.

ඔහුට ඇයව මුලින්ම මුණ ගැසුනෙ උත්සවයකදි. ඇයගෙ හැසිරීම් රටා හා රූපය එතන හිටපු පිරිමි බොහෝ දෙනෙක්ගෙ සිත් ගත්තා. ඒත් ඔහු එතන හිටපු අයගෙන් බොහොම සාමාන කෙනෙක්. කිසිම කෙනෙක්ගෙ අවධානය දිනා ගත්තෙ නෑ. සම්භාෂණය අවසානයේ ඔහු ඇයට කෝපි බීමට කථා කලා. ඇයට මේ ගැන පුදුම හිතුනත් ඔහුගෙ තිබුන විනීතකමට ඇයට ඒ ඉල්ලීම අහක දාන්න බැරි උනා. මේ දෙන්නා කෝපි බොන්න අවන්හලකට ගියා. ඔහු කිසිවක් කියාගන්න බැරිව කලබලාකාරී ගතියකින් හිටියෙ. මේ නිසා ඇය හිතුවා ඇයට ඉක්මනින්ම මෙතනින් යන්න තිබුනනම් හොඳයි කියලා.

හදිසියේම ඔහු වේටර්ට මෙහෙම කිව්වා. “මට ලුණු ටිකක් දෙනවද මගේ කෝපි එකට දාන්න?” හිටපු හැමෝම අමුතු විදිහට ඔහු දිහා බැලුවා. ඔහුගෙ මුහුණ රතු උනා. ඒත් ඔහු ලුණු ටික කෝපි එකට දාලා ඒක බිව්වා.

ඔහු කරපු දේ ගැන උනන්දුවෙන් සිටි ඈ ඔහුගෙන් මෙහෙම අහුවා. “ඒ කරපු දේ ඒ කාලෙ ඉඳන්ම ඔයාගෙ පුරුද්දක්ද?”

“මම පොඩි කාලෙ අපි ජීවත් උනේ මුහුදක් අයිනේ. මම ගොඩක් ආසයි මුහුදෙ සෙල්ලම් කරන්න. මේ ලුණු රහ කෝපි එක වගේම තමයි මට ඒ මුහුදෙ තියෙන රසයත්. මට හැම වෙලාවකම මගේ පොඩි කාලෙ මතක් වෙනවා. මට මං උපන් ගම මතක් වෙනවා. මට ඒ පාලුව දැනෙනවා. තවමත් එහේ ජීවත් වෙන මගේ දෙමව්පියන් නැති පාලුව දැනෙනවා.” ඇස් වල කඳුලු පුරෝගෙන ඔහු කිව්වා. මේ සිද්ධියෙන් ඔහු ඇගේ සිත් ගත්තා.

ඇය හිතුවා මේ ඔහුගෙ ඇත්තම සිතුවිලි වෙන්න ඇති කියලා. තමන්ගේ නිවසින් ඉවත්වී සිටීමේ දුක කියන්න පුලුවන් කෙනා තමන්ගෙ ගෙදරට ගොඩක් ආදරේ කරන, හොයලා බලන, වගකීමක් ඇති කෙනෙක් කියලා ඈ සිතුවා. ඒ නිසා ඇයත් ඇගේ ගෙදරින් දුරක සිටීමේ දුක, ඇගේ ළමා කාලය, පවුලෙ විස්තර ආදිය කිව්වා. මේක ගොඩක් සුන්දර කතාවක් උනා වගේම ඒ දෙන්නාගෙ ආදර කතාවේ ආරම්භයත් උනා.

මෙහෙම කිහිප දිනක් මේ දෙන්නා හමුවී කතා කරනකොට ඇයට හිතුනා ඔහු තමයි ඇගේ උරුමක්කාරයා බව. ඔහුට ඉවසීම, සොයාබැලීම, අවංක බව වගේම ආදරණීය හදවතකුත් තිබුණා. ඔහු ගොඩක් හොඳ කෙනෙක් බව හැඟුණා. ඔහුගෙ ලුණු දාපු කෝපි එක නොවන්නට ඇයට ඔහුව මගහැරීමට ඉඩ තිබුණා නේද කියලා ඇයට හිතුණා. හැම ලස්සන ආදර කතාවකම වගේ මේ දෙන්නත් එකතු උනා. මේ දෙන්නා සතුටින් ජීවත් උනා. ඇය ඔහුට කෝපි හදන හැම වෙලාවකම කෝපි එකට ලුණු ටිකක් දැම්මා. ඇය හිතුවා ඔහු ඒකට ගොඩක් කැමතිවෙයි කියලා. අවුරුදු 40 කට පස්සේ ඔහු ජීවතුන් හැර ගියා. ඔහු ඇයට මෙහෙම ලියුමක් ලියලයි මිය ගොස් තිබුණෙ.

“මගේ සොඳුරිය, මට සමාවෙන්න. මගේ ජීවිත කාලෙම බොරු කලාට සමාවෙන්න. මේක තමයි මං ඔයාට කියපු එකම බොරුව. ඒ ලුණු දාපු කෝපි එක ගැන. අපි හමු උන මුල්ම දවස ඔයාට මතකද? එදා මම හරිම නොඉවසිල්ලෙන්, අපහසුතාවෙන් හිටියේ. මට ඕනෙ උනේ සීනි ටිකක්. ඒත් මට ඒ වෙලාවෙ කියවුනේ ලුණු කියලයි. ඒක මට ඔයා ඉස්සරහ ආයේ කියන්න ලැජ්ජා හිතුනා. ඒ නිසා එහෙමම මං ලුණු දාලා බිව්වා. මං කවදාවත් හිතුවෙ නෑ ඒක අපේ ජීවිතයෙ ආරම්භය වෙයි කියලා.”

“මං ඔයාට ඇත්ත කියන්න හුඟක් උත්සහ කලා. ඒත් මට බය හිතුනා. ඒ නිසා මං හිතාගත්තා ආයෙත් ඔයාට කිසිම බොරුවක් කියන්නෙ නෑ කියලා. මේ මගේ මරණ මංචකය. ඒ නිසා ඔයාට ඇත්ත කියන්න මං පැකිලෙන්නෙ නෑ. ඇත්තටම මං ලුණු දාපු කෝපි වලට කැමතිම නෑ. ඒකෙ තියෙන්නෙ හරිම ජරා රහක්. ඒත් මට මුලු ජීවිත කාලෙම බොන්න උනේ ලුණු දාපු කෝපි. ඒත් ඔයා මට දුන්න ලුණු දාපු කෝපි මං බිව්වෙ ඔයාට තියෙන ආදරේ නිසයි.”

“ඔයත් එක්ක හිටපු කාලෙ තමයි මගේ ජීවිතේ ලස්සනම කාලය. ආයෙත් පාරක් මට ජීවත් වෙන්න අවස්ථාවක් ලැබුනොත්, ඒ මුලු ජීවිත කාලෙම මට ලුණු දාපු කෝපි බොන්න උනත්, මං ඔයත් එක්ක ඉන්නවා.”

මේ ලියුම බලලා ඇගේ ඇස් වලින් කඳුලු කඩා හැලුනා. කවදාහරි ඇගෙන් කවුරුන් හෝ කෙනෙක් ලුණු දාපු කෝපි මොන රහද කියලා ඇහුවොත් ඇය කියාවි “ඒක හරිම පැණි රහයි” කියලා.

ජීවිතය කියන්නේ වැරදි හදාගෙන ජීවත් වීමයි. (සත්ය කතාවක් ඇසුරෙනි.)

අදත් මල් දෙවැටෙන් කියන්න යන්නෙ තවත් කථාවක් ගැන. මේක විශේෂයෙන්ම වැදගත් වෙන්නෙ අපේ මල් දෙවැටත් එක්ක එකතු වෙලා ඉන්න ආදරයෙන් බැදිලා ඉන්න අපේ යුවල් වලට. ඒත් ඉතින් තනිකඩ අපේ යාලුවන්ටත් මේකෙන් ඉගෙන ගන්න දේවල් තියෙනවා. කලින්ම කියන්න ඕනෙ මේක සත්‍ය කතාවක් බව. එහෙනම් අපි කතාව කියවමුකෝ.

මේ කතාව පටන් ගන්නේ Jocelyn (ජොසලින්) හා William (විලියම්) යන දෙදෙනාගේ විවාහ උත්සවයෙන්. මේ දෙදෙනාගේ විවාහ උත්සවය අවසානයේ ජොසලින්ගේ අම්මා එයාට $ 1000 ක් තැන්පත් කරලා අලුතින්ම විවෘත කරපු බැංකු පාස් පොතක් දීලා ජොසලින්ට මෙහෙම කිව්වා.

“ජොසලින් මේ බැංකු පාස් පොත ගන්න. මේක ඔයාලගෙ විවාහයේ සටහනක් විදිහට තියාගන්න. ඔයාලගෙ අලුත් ජීවිතයේ මොකක්හරි සතුටුදායක හෝ මතක හිටින දෙයක් උනොත් මේකට සල්ලි කීයක් හරි දාන්න. දාලා ඒ සතුටට හේතුව මොකක්ද කියලා මේකෙ පැත්තකින් ලියන්න. වැඩියෙන් සතුටුදායක හෝ මතක හිටින දෙයක් උනොත් වැඩියෙන් සල්ලි දාන්න. මුල්ම තැන්පතුව මම දැම්මා. ඔයා මේක විලියමුත් එක්ක කරගෙන යන්න. කාලයක් යනකොට මේක බලලා ඔයාලට පුලුවන් ඔයාලා කොයිතරම් සතුටින් හිටියද කියලා බලාගන්න.”

ජොසලින් මේ අදහස විලියම් එක්ක බෙදාගත්තා. දෙන්නම හිතුවා මේක ගොඩක් හොඳ අදහසක් කියලා. එයාලා අලුත් ගෙදරකට ගියා. මේ දෙන්නා ගොඩක් උනන්දුවෙන් හිටියේ මොකක්ද එයාලගෙ දෙවන තැන්පතුව කියලා බලාගන්න.

ටික දවසක් ගියාම මේ විදිහේ දෙයක් තමයි දැකගන්න පුලුවන් උනේ. මෙයාලගේ බැංකු පාස් පොතේ මුල් පිටුවේ සාරාංශයක් මං මෙහෙම දාන්නම්.

• Feb 07 - $ 100  : විවාහ උත්සවයෙන් පසු විලියම්ගේ මුල්ම උපන්දින සැමරුම
• Mar 04 - $ 300  : ජොසලින්ගේ වැටුප් වැඩිවීම
• Mar 20 - $ 200  : බාලි දූපතට ගිය විනෝද චාරිකාව
• Apr 16 - $ 2,000  : ජොසලින් ගර්භනී වීම
• Jun 01 - $ 1,000  : විලියම්ට රැකියාවේ උසස් වීමක් ලැබීම

…………………….. ආදී සටහන් රැසක් තිබුණා.

කොහොමහරි අවුරුදු ගණනාවකට පස්සේ එයාලා සුලු දේකට පවා රණ්ඩු උනා. එකිනෙකාව විවේචනය කරන්න උනා. වැඩිපුර කතා කළෙත් නෑ. එයාලා බැන්දේ ලෝකෙ ඉන්න නරකම සහකාරයව කියලා හිතලා එයාලා කණගාටු උනා. කිසිම ආදරයක සේයාවක්වත් තිබුනෙ නෑ.

දවසක් ජොසලින් එයාගෙ අම්මට දුරකතනයෙන් කතා කරලා මෙහෙම කිව්වා. “අම්මෙ අපිට තවදුරටත් එකට ඉන්න බෑ. අපි දික්කසාද වෙන්න තීරණය කලා. මට හිතාගන්න බෑ ඇයි මං මේ මිනිහව බඳින්න තීරණය කළේ කියලා.”

එතකොට අම්මා මෙහෙම කිව්වා, “ඇත්ත කෙල්ලෙ, ඒකෙ ඇති වරදක් නෑ. තවදුරටත් ඔයාලට එකට ඉන්න බැරි නම් ඔයාට හිතෙන දෙයක් කරන්න. ඔක්කොටම කලින් එක දෙයක් කරන්න. මතකද මං ඔයාලට විවාහ දවසේ බැංකු පාස් පොතක් දුන්නා. ඒකෙ තියෙන ඔක්කොම සල්ලි අරන් වියදම් කරන්න. ඒ වගේ කාලකණ්නි විවාහයක සටහන් තවදුරටත් තියාගන්න එපා.”

ජොසලින්ට එයාගෙ අම්මගෙ කථාව ඇත්ත නේද කියලා හිතුනා. එයා බැංකුවට ගියේ ගිණුම අවලංගු කරලා සල්ලි ගන්න කියලා හිතාගෙන. ගිහින් පෝලිමේ ඉන්න ගමන් නිකමට පොත ඇරලා බැලුවා. ඒක බලනකොට එයාලගෙ විවාහයේ පරණ සතුටුදායක මතකයන් එකිනෙක මැවෙන්න ගත්තා. ඇගේ ඇස් කඳුලු වලින් පිරුණා. එයා ආයෙත් ගෙදර ගියා. ගෙදර ගියාම බැංකු පොත විලියම්ට දීලා දික්කසාදෙට කලින් ඒ සල්ලි ඔක්කොම වියදම් කරන්න කියලා කිව්වා.

ඊළඟ දවසෙ විලියම් බැංකු පාස් පොත ජොසලින්ට ආයෙත් දුන්නා. ජොසලින් සල්ලි අරන්ද බලන්න ඒක ඇරලා බැලුවා. බලනකොට ඒකෙ $ 5,000 ක අලුත් තැන්පතුවක් තිබුණා. ඒකෙ පැත්තකින් මෙහෙම තිබුණා.

“අද තමයි මං දැනගත්තෙ මේ අවුරුදු කීපයට මං ඔයාට මොනතරම් ආදරය කරලා තියෙනවද කියලා. ඔයා මට මොනතරම් සතුටක් ගෙනවිත් දීලද?”

පාස් පොත පැත්තකින් තියලා එයාල බදාගෙන අඬන්න ගත්තා. මං දන්නෙ නෑ එයාලා කොයිතරම් සල්ලි එකතු කරලද කියලා. ඒත් මම හිතන්නෙ වැදගත් වෙන්නෙ සල්ලි නෙවෙයි, එයාලා මේ අවුරුදු කීපයේ මොනතරම් සතුටින් හිටියද කියන එකයි.

අන්තිමට මං මල් දෙවැටෙන් මෙන්න මේ අවවාදය දෙනවා. “ඔයාල වැටෙනකොට වැටුනෙ කොතනින්ද කියලා බලන්න එපා, ඒ වෙනුවට ඔයාව ලිස්සුවෙ කොතනින්ද කියලා බලන්න. මොකද ජීවිතය කියන්නෙ වැරදි හදාගෙන ජීවත්වෙන එකයි.”

ඔබ ඇගේ සිහින කුමරාද?

අදත් මල් දෙවැට සමග එකතු උන යාලුවන්ට මුලින්ම මම සුභම සුභ අලුත් අවුරුද්දක් වේවා කියලා ප්‍රාර්ථනා කරනවා. ඔන්න අලුත් අවුරුද්දෙ හාපුරා කියලා මං ලියන්න යන බ්ලොග් සටහන තමයි මේක. මේ සටහන තවම අපේ තනිකඩ, ආදරයක් බලාපොරොත්තුවෙන් ඉන්න අපේ සහෝදරයන්ට තමයි ගොඩක්ම වැදගත් වෙන්නේ. කියවලම බලන්නකෝ.

ඔයාලා අහලා ඇති ශරීර භාෂාව ගැන. අපි මේකට ඉංග්‍රීසියෙන් කියන්නෙ Body Language කියලා. අපි හැමෝම දන්නවා ශරීර භාෂාව පවතින බව. ඒත් එය හදුනාගන්න හැටි අපේ වැඩි පිරිසක් දන්නෙ නෑ. අද මං කියන්න යන්නෙ කොහොමද ගැහැණු ලමයෙක්ගෙ ශරීර භාෂාව අනුව එයා අපිට කැමතිද නැද්ද කියලා දැනගන්නේ කියලා. හැබැයි කියන්න ඕනෙ මේක දළ සටහනක් මිසක් විද්‍යාත්මක විශ්ලේෂණයක් නම් නෙවෙයි. මේකෙ තියෙන සමහර දේවල් මාත් සුන්දරව අත්වින්දා.

• ·         ඇගේ ඇස් දිහා බලන්න. ඒ ලස්සන ඇස් හා ඒවායේ කණීනිකාවන් (කලු ඉංගිරියාවන්) විශාල වේ නම්, ඒ ඇය ඔබට කැමති බව හඟවන්නක්. තමන් කැමති දෙයක් දකිනකොට තමන්ගේ කලු ඉංගිරියාවන් විශාල වන බව විද්‍යාත්මක පිලිගත්තක්. (හැබැයි එයා දිහා බලනකොට නම් ඔයාලා ඇස් ලොකු කරලා බලන්න එපා. මොකද ඔයාට ඕනෙ නෑනෙ ඇය ඔයා ගැන වැරදි විදිහට හිතනවට)

• ·         තද ඉරියව්වෙන් ඉන්න ඇගේ ශරීරය. ඇය ඉන්නෙ අත් නවාගෙන පසුපසට මදක් ඇලව ද? පහසු ඉරියව්වක් නැති තද ඉරියව්වෙන් නම් ඇය ඉන්නෙ, ඒකෙන් කියන්නෙ ඇය ඔබ සමග ඉන්නෙ අපහසුතාවකින්. මේ වගේ අවස්ථාවක කරන්න පුලුවන් හොඳම දේ තමයි ඇය කියන්න කලින් ඇයට තාවකාලිකව සමුදෙන එක.

• ·         හරස් කරගත් දෙපා. ඔබ දෙදෙනා ඉඳගෙන සිටින විට ඇය ඔබ දෙසට හැරී ඇගේ දෙපා හරස් කරගෙන සිටිනවා නම් එයින් කියන්නේ ඈ ඔබෙන් ඉවත් වෙන්න උත්සහ කරන බවයි.

• ·         ඇගේ දෙපතුල් බලන්න. මුහුනෙන් පුලුවන්නම් හැඟීම් ප්‍රකාශ කරන්න ඇයි දෙපතුල් බලින් බැරි? ඇගේ දෙපා වලින් දිගට හෝ හරහට ඉරි අදිනා සේ සිහින් සෙලවීමක් තිබෙනවා නම් එයින් පෙන්වන්නෙ ඇයට ඔබව අවශ්‍ය බව යි.  ඒත් ඇය ඇගේ කකුලකින් අනෙක් කලුලට තට්ටු කරනවා නම් ඒ ඈට කම්මැලිබව හඟවන්නයි. පැත්තට හෝ ඉදිරියට මදක් වේගයෙන් කකුල් චලනය වේ නම් එයින් කියන්නේ ඇගේ අදහස ඔබෙන් ඉවත් වීම බවයි.

• ·         ඇගේ කොණ්ඩය දිහා බලන්න. ඇය ඇගේ කොණ්ඩය සෙමෙන් පද්දයි නම් ඈ ඔබව ඇගේ සිහින කුමරා කරගැනීමට සිතයි. ඒත් ඈ කොණ්ඩය කසයි නම්…. කණගාටුයි.

• ·         ඈ ආදරයෙන් ඇගේ ශරීරය පිරිමදී නම් එය ධනාත්මක ලක්ෂණයක්. ඒත් කැසීම්, ඇදුම් හදා ගැනීම් වලින් කියන්නෙ සමුගත්තොත් හොඳයි කියන එක.

• ·         හිසේ චලනයන්. ඇගේ හිස පැත්තකට ඇලව ඇගේ මුහුණේ සුමුදු බවක් දක්වයි නම්, සුභ පැතුම් ! ඔබ සාර්ථකයි. ඒත් රවා බලයි නම් ඒ සමුදෙන්න කාලයයි.

• ·         ඉඟි සහ අභිනයන්. මේ දෙකම ඇය ඔබව ඉතා උනන්දුවෙන් නිරීක්ෂණය කරන බවට දක්වන ධනාත්මක ලකුණු. මදක් ඉවසන්න, නියම අවස්ථාව පැමිණි විට ආදරය පවසන්න.

ඔන්න යාලුවනේ ඔයාලට ඉඟි කිහිපයක්. කෙල්ලෙක්ගෙ ආදරය ලබාගන්න මොන තරම් දුකක් විදින්න ඕනෙද කියලා මං දන්නවා. මේකෙන් ඔයාලට පොඩි හරි උදව්වක් දෙන්නයි මට ඕනෙ උනේ. අපේ තනිකඩ, ආදරයක් බලාපොරොත්තුවෙන් ඉන්න අපේ සහෝදරයන්ට සුභ පැතුම් !